స్నేహితుడు

 Happy Friendship day 

నీ మనసు తడిసిన ప్రతి భావాన్నీ పంచుకునే వాడు,

నిన్ను మందలించగల చనువు ఉన్నవాడు,

నీ కష్టం తెలుసుకుని తోడు నిలిచే వాడు,

నీ సంతోషంలో చిరునవ్వుకు కేరాఫ్ అతడు,

నీ దుఃఖంలో మౌనాన్ని అర్థంచేసుకునేవాడు,

నీ జీవిత మలుపుల్ని నిజంగా గమనించేటోడు,

నీ ఆటోబయోగ్రఫీలో…

ఆఖరి పేజీకి ఆటోగ్రాఫ్ వాడు 

అతడే హితుడు, సన్నిహితుడు…నీ స్నేహితుడు

స్నేహితుల దినోత్సవ శుభాకాంక్షలందరికీ .💐

ఆపరేషన్ సింధూర్

“జో రంగ్ మాంగ్ మే చుప్ థా,

అది అందరి చూపుల్లో ఎందుకు పడింది?

అది నా ఆనందానికి గుర్తు, కానీ 

ఇప్పుడు అందరి ప్రశ్నగా మారింది…”

నా మనఃస్థితిని ఎవ్వరూ అడగలేదు,

కేవలం సింధూరంతోనే నా విలువను కొలిచారు.

ఒక వాగ్ధానానికి నేను మౌనంగా జీవించాను,

ఇప్పుడు ప్రతి చూపులో ప్రశ్నలకే నేను సజీవం.

ప్రేమను సూచించే గీతం 

అది, శృంగారానికి సంకేతం,

కానీ ఇప్పుడు అది కేవలం 

గుర్తింపు క్రమంగా మిగిలిపోయింది.

ప్రతి గుర్తింపును చూపించాల్సిందేనా?

నాది అనిపించేది, అందరికీ చెప్పాల్సిందేనా?”

-/ రుద్ర 

స్వార్థం

———

అహం మోహానికి ఒరిగి

సమూహం సత్తాకు మరిగి

వికృత విబేధాల పెరిగి

ప్రతి మెదడు మలినాన

మొలిచి, నిలిచి గెలిచి

సమాజానికి, జనానికి మత్తై

నీది, నాది,

మాది, మీది

ఆలోచనల అవధై

ప్రేమ, దయ

జాలి, కరుణ

పదాల సమాధై 

సత్యమేవజయతేకి

స్వార్థమేవజయతే 

పర్యాయపదమై

నిజం, నిజాయితీలను

నగ్నంగా నిలబెట్టి

జాతీయాల చదువుకోమని

వెకిలిగా వెక్కిరిస్తూ 

మనిషి మనసును 

ఉనికిని, హేళన చేసే

అంతరంగ అశుద్ధం

తెలుగు పూదోట

ఏపుగా పెరిగి..

క్షవరం అవసరమైన

తెలుగు అక్షరం స్వార్థం!

RNA కిరీటి

కఠోర నిజమైన మనుషుల్లో స్వార్థమనే వ్యర్ధాన్ని
రోకలిబండలాటి కరోనా సత్యమనే రోట్లో వేసి దంచి
నాది, నేను అనే జీవిత అహంకారం వంకర తీసి
సమానత్వం, మానవత్వం అర్థాలను తిరిగి
పరిచయంచేసి కనువిప్పు కలుగజేసె ప్రపంచ జనానికి,
2020 సంవత్సరాన మకుటమక్కరలేని RNA కిరీటి ‘కరోనా’

World Cleaner’s day

అపరిశుభ్రమగు పరిసరాల శుభ్రంచేసి
మలినాలను కడిగి, నీ ఆరోగ్యం కాపాడే
పారిశుధ్యకార్మికులపై దయలేని దరిద్రుడా!
కొన్ని మంత్రాలను నీకర్థమవని భాషలోజెప్పి
నెత్తిన శఠగోపమెట్టి, నీ జేబుకు చిల్లుబెట్టి,
నువ్విచ్చే దక్షిణ తాకి, నినుముట్టితే మైలనుకునే
పూజారికి మొక్కు, మతిలేని నికృష్ట మానవా!
కరోనా, కఠోరంగా తెలిపిన జ్ఞానమిది తెలుసుకో
తెలివితో మెలిగి ‘పరిశుభ్రత’ ‘కరుణ’లకు తావిచ్చి
భయమనేభక్తికంటే, శాస్త్రీయఅవగాహనతో బతికిపో!!

On (15th June) World Cleaner’s day ని పురస్కరించుకొని.. పారిశుద్ధ్య కార్మికులకు వినమ్ర ప్రణామాలతో💐

పరువు హత్య

ముందుగా,ఈ కవితలో నాభాషను క్షమించి భావావేశ గాఢతను అర్ధం చేసుకొంటారని మనవి.

మనుషుల్లో మంచితనాన్ని, గొప్పతనాన్ని నాగరికతతో, మానసిక పరిపక్వతతో ఎంచుతామే కానీ వారి కులంతో, మతంతో కాదు అని నమ్మి ... కులాల కంపును, జరుగుతున్న పరువు హత్యలను చూసి భరించలేక వేదనతో రాసిన కవిత.

 పరువుహత్య మాట విని

హృదయం బరువైంది

అశృవులతో, ఆవేశంతో

నా కన్నెరుపెక్కింది 

అమృతం వర్షించే మనసు

ఆ ప్రణయ హత్యోదంతో 

నిండు గర్భిణి, సోదరి 

అమృతవర్షిణి ఆవేదనకు 

చలించి కత్తై, నా కలం కదిలిందిలా

కులదురహంకారంపై ... కసిగా,

కులం మలం తిని

అదే బలం అనుకొని

తెగ మొరిగే శునకాల్లారా!

మా కులమెక్కువని పెట్రేగే

అహంకార, కుసంస్కారుల్లారా

మనిషిగ బ్రతకలేని మృగాల్లారా!

ఇరువదితరాల వెనుకకు, 

తాత ముత్తాతలపేర్లే తెలియని, సంకరజాతి మనందరిదని

మలినమైన మీ బుర్రలకెరుకేనా?

నీతిమాలి, దౌర్జన్యాలతో

అక్రమాస్తుల, పైసల,

పెత్తందారీ పదవులనార్జించి 

పరువు పెంటకుప్పల పేర్చి  

అశుద్ధాన్ని అమృతంలా ఆరగిస్తూ,

ఆత్మీయత అనే అర్థాన్ని

కులాహంకారానికి ఆపాదిస్తూ 

ఆ అవలక్షణాన్ని అందరికీ అంటిస్తూ

మీ స్వార్ధం వ్యర్ధాలను పోగేస్తూ

మనుషుల మనసు, మానవత్వాన్ని

మీ కులజాడ్యాలతో విభజించి పోషిస్తూ

పరువు హత్యల పేరున,

నిండు ప్రాణాలనే బలికొంటూ

కులం కాలకూటవిషంతో, విషనాగులై,

పచ్చని సంసారాలను ఛిద్రం చేస్తూ..

కులం, మతం, దైవం ఆచారాల వంకతో

బావిలో కప్పలవలె, మనువునీతిదని,

ఆ అభిజాత్యాన్ని పెంచి పోషిస్తూ,

యువత భవితను కోతిని చేసి ఆడిస్తూ

చివరకు ఆ గోతిలోనే పడి ఛస్తూ

ఏం బావుకుంటావురా?  

జీవిత చరమాంకంలో?

 ఛీ .ఛీ... నీచ నికృష్ట కులగజ్జి రోగి!!

నీ జబ్బుకు మందెక్కడో లేదు

నీలోనే ఉందది, వెతుకు నిబద్దతతో,

మనిషిగా, మంచిగ బతకాలనుకొంటే

అతిత్వరగా అలోచించి నయంచేసుకో

లేకుంటే, అన్నివిధాలా అత్యధికంగా

మానసికంగా, కృశించి, నశించి,

ఈ విశ్వానికి పట్టిన చీడ పురుగై,

మరుగై పోతావ్..!  ఖబడ్దార్!!

అంతేకాదు,

ఈ ఇరవై ఒకటో శతాబ్దంలో

కులం శబ్దమినివించిందో..?

రేపటి తరం, నీ శిశ్నము కోసి

కాకుల గద్దలకాహారంగా వేసి

నువొక మానసిక రోగివని,

నీ ఉద్రేకానికి, ముద్రేయ్యకముందే

ప్రపంచగతినర్ధంచేసుకుని మారిపో ?

లేకపోతే, నీకిక పుట్టగతులుండవ్

ఈ నవ యువ ప్రపంచీకరణాన !

(నల్గొండ జిల్లా మిర్యాలగూడ వాసి, పరువు  హత్యకు గురైన "ప్రణయ్" కు శ్రద్ధాంజలితో )

తెలుగంటే?

తెలుగంటే??

తెలుగంటే, గుర్తింపుకై
మురిపెంగా నువు ధరించే
తెల్లచొక్క, ధోతీకాదురా!
ఆ ఉనికిని పెంచగ
భుజంపై వేలాడే
ఉత్తరీయం కాదురా!
తెలుగంటే భాషరా!
తెలుగంటే మాటరా!
తెలుగంటే  పాటరా!
భాషతొ మమేకమవ్వాలంటే
నీజీవన సంజీవనదవ్వాలంటే        

ఇంటా, బయట
అనుభూతితో, నువ్వు
పలికితేనే అది బతికేది
మాటాడితేనే మనేది

తెలుగు భాష ఎవరిది తెలుసా?
ఎన్నోభాషల నేర్చి, పాండిత్యం గడించి
గండపేరుండాలను పొందిన
ఉద్దండ పండితుడిది కాదు

ఈ భాషలో తప్ప
వేరే భాషానుభూతిని
పొందే అవకాశంలేని
పామరుడి తల్లిభాషరా!తెలుగు భాష!!

అపుడెమో సంస్కృతం
సంకనెట్టి మరీ సగం చంపారు,
ఆంగ్లానికిప్పుడేకంగ అమ్మేశారు.

కాస్తంత, ఇప్పుడైనా
చదవండి, రాయండి
గ్రాంధికమని, గ్రంథస్థమని
కట్టుబాట్ల, భాషను బంధించి
వాడుకని,యాసని,
స్వచ్ఛమైన భాషని
అక్షర ఆంక్షలకిక పోకండి.

భాషను మీనమేషాలకు
శ్లేషలకు, పరిమితి చేసి
తేట తెలుగునుకూడా
సంస్కృతంలా, సంధ్యవార్చి
అత్యుత్సహంతో అటకెక్కించకండి.

అందరి మదిగదిలో
నదిలా, సెలయేరులా
భాషను, భావాన్ని
ప్రజావాహినిలో, సాహితీ ప్రపంచాన
ఆలోచనతో, అవగాహనను పెంచి

పరస్పరం తమ, పర
సత్కారాల, పురస్కారాలకే గాక
తెలుగు భాషోద్యమం, అనే
యజ్ఞంలో భాగస్వాములవుతూ
ఏ దిక్కునున్నా దిక్సూచులై నిలిచి
తెలుగు భాష ఋణానుబంధాన్ని
కాస్తైనా తీర్చుకొనే అవకాశాన్ని
అందుకొని, ఆదర్శంగా నిలుద్దాం.

N “light” (Treat) menT

—————////———-
14 సంవత్సరాలక్రితం
ఆస్ట్రేలియా ఫ్లైట్ టికెట్ కొనేప్పుడు
డాలర్ పడిపోతే బావుండనుకొన్నా

14 సంవత్సరాల తరువాత
ఇండియాకి వెళ్ళాలనుకొంటూ
రూపాయి పడిపోవాలనుకొంటున్నా  ...
విచిత్రం ! కాదు కాదు, స్వార్థం!

అసలు విషయమేంటంటే ?
ఈ మధ్యలో, వయసు పైబడి
తెల్లెంట్రుకలు ఎక్కువై,
కంటద్దాల పవర్ పెరిగి
ఎముకల పటుత్వం తగ్గి,
నరాల్లో సత్తువ నశించి

అన్నీ తినలేక, తిన్నా అరగక
నిద్ర చిధ్రమై, ఆసలు చావక,

ఏదేదో సాధించాలనీ, ఏమీచేయలేక

అరే! ఇది,మిడిల్ ఏజ్ క్రైసిస్. ఇపుడెలా..?

అని, అతి త్వరగ గుర్తించి...

తిక్క సన్నాసిని, వేదాంతం వైద్యమనుకొని
మిడి మిడి జ్ఞానంతో , మెదడుకు మైనం పూసుకొని
గీత ముందేసుకొని, నా గజిబిజి మనసును
ఒక గీతలో పెట్టమని, దేవుడ్నడిగితే ఎలా?

సరిగ్గా అప్పుడే ... అదిగో!
నా అంతరాత్మ( ఆకాశవాణి) చెప్పింది… ఇలా !

“నీలో మనిషిని గుర్తించి
మానవత్వంతో మెసలి
జ్ఞానమనే దివ్వెను వెలిగిస్తే
మెదడున మైనంకరిగి
కొవ్వొత్తిలా.. దారి చూపి
కొందరికైనా సహాయపడి
నీ జన్మను  సార్ధకం చేసుకో … వృద్ధాప్యంలో...!”

If you know how to lighten desires and tight situations, early in your  life....  you are “enlightened”..!

ఏ పాటి?

ఎవరు ఏ పాటి?
తెలిసిందేపాటి? ఎరుకైందేపాటి?
ఎవరికి ఎవరు సాటి?
ఎవరెవరి మధ్య ఈ పోటీ?

ఒకడేమో సహపాటి
మరొకడు ఘనాపాటి
ఇప్పుడింకొకడు తయారు!

వ్యాపారంలో లాభం రాక
ఉద్యోగంలో రాదనా రూక
మనుషుల్లో బలహీనత
ఎంచక్కా  గమనించాక
పట్టాడీ ప్రవచనాల బాకా..!

వినేవాడికి చెప్పేవాడు లోకువన్నట్టు
ఇతగాడు చెప్పే నీతులు
తీసే కులాల లోతులు
ఆతని సమాజ రీతులు
ప్రజాస్వామ్యానికి గోతులు
రాజ్యాంగ వ్యతిరేక కారకాలు
ఇతడు ఛాందస భావాల
ముసుగులో కుహనా పాటి
డబ్బుకు గడ్డితినడమే పరిపాటి.

సంభావనలేకుండా ఒక్క ప్రవచనం
చెబుతారేమో చూడండి?
కులం హలంనుండి పెల్లుబికిన
సనాతన మురికే ఈ గడ్డిపాటి
తస్మాత్ ! జాగ్రత్త !!

 ఎవరిది ఏ స్థాయి?
నిర్ణయించడానికి, వీరికెక్కడిదా స్థాయి?
ఎవరిక్కడ, ఎప్పటికీ చిరస్ధాయి?
మనుషుల్లో హెచ్చు తగ్గులు
పుట్టుకతో ఎలా వస్తాయి ?
కొందరికే, అవెలా తెలుస్తాయి?


నాటికి, నేటికీ
తమ స్వార్థంకై
మాట మాటకీ
శ్లేషను, విశ్లేషణను
పురాణఇతిహాసాలను
ఇప్పుడు, కొత్తగా ప్రవచనాలని
నీతని, నేతిమాటల చెప్పి
పట్టు పీతాంబరాలతో
ఒకింత సాంకేతికత
జోడించి, జూ లక టక
మాటల మూటలను
గంటల పంచాంగాలతో
వాస్తు అవాస్తవాలతో
తిమ్మిని బిమ్మిని చేసే
మాటల గారడీలతో
హిందుత్వ అజెండాల
మతతత్వ అధికార అండతో

అమ్మని, సరస్వతమ్మనీ
అమ్ముకొని, పబ్బంగడుపుకొనే
వ్యాపారం ఊపందుకొంది.
మానవుల, మనువు బానిసల
చేసే పర్వం ఆరంభమైంది
ఈ ఇరవయ్యొకటో శకంలో

మేలుకో, ఓ యువతా మేలుకో!!
ఈ జగతి జాగృతికై
విచక్షణతో వీక్షించి, ప్రశ్నించి
సమాధానపడి, సంయవనంతో
ప్రపంచాన్ని గమనించి నడుచుకో!
నీ జీవన గమనం మెరుగుపరుచుకో!!
మానవత్వంతో ప్రపంచాన్ని గెలుచుకో !!!

Left Hand (left behind)

దక్షిణ రాష్ట్ర హోదా
----------------------
దేహంలో భాగమైన,
ఎడమ చేయి ఎప్పుడూ
మెదడుకు  మానసికంగా
ఎంతైనా కొంత దూరమే
దక్షిణ రాష్ట్ర హోదా పోరుతో
ఆ కుడి ఎడమల తేడా తెలిసిందా?

పురాణ ఇతిహాసాల్లోనూ
జాతి, నిజాయితీల పరంపరల్లోనూ
కృత, త్రేతా, ద్వాపర, కలి
యుగయుగాలుగా ప్రక్కన పెట్టేసి,
అసురుల్ని, అధముల్ని చేసి
మాలో అనైక్యతనే ఆయుధంగా చేసుకొని
అశుద్దాన్ని కడిగేందుకు మాత్రమే,
సమైక్య భారతావనికి, ఉపయోగపడిందా? దక్షిణం.!


ఉత్తరాది నుండి అరువు
తెచ్చుకొన్న ఆ దేవుళ్ళు
రాముడైనా ?, కృష్ణుడైనా ?
ఉత్తరాన తెలుపులో
దక్షిణాదిన నలుపులో
రంగుల్లో ఆ తేడాలేందో?


దక్షిణాదిని రాజ్య విస్తరణకై
మోసపూరిత యుద్ధ తంత్రాలతో
వాలిని చంపి సుగ్రీవునికి
రావణుని చంపి విభీషణునికి
స్వతంత్రుల సామంతుల చేసి
వదినలను, మరుదులతో
నీచంగా వివాహమొనరించి
లక్ష్మణునికేమో సీతను తల్లిని చేసి
నీచ సంస్కృతి మాదని  ప్రవచించి
దక్షిణ పై వివక్ష చూపిన పురాణ తప్పిదం !


ఇప్పటికైనా ..,,

మనమంతా భారతీయులం
మనదంతా భరత జాతనే
అపోహనుండి బయటకురండి!

మనమంతా వివిధ తెగల, భాషల
ప్రాంతాల, నాగరికతల ప్రజలమని
ఆ వైరుధ్యాలన్నీ తెలిసి, కలిసుండే
ఉత్తర, దక్షిణ, మధ్య ప్రజలమని
గ్రహించి, అభివృద్ధిని కాంక్షించి

సమతుల్యం పాటించి, సమంగా

విభజించి  పాలించుకొంటేనే
ఈ ప్రజాస్వామ్యాన ఐక్యత, సఖ్యత.

మార్పు (CHANGE)

మార్పు,
నిప్పులాంటి  నిజం.
మనం ఔనన్నా, కాదన్న
అమ్మ గర్భం నుండే ఆరంభం,
మన పుట్టుకతో ప్రారంభం.

కాలం మార్పుకు సూచిక,
ప్రక్రుతి, మనిషిప్రవృత్తే గమనిక.
సమాజంలో మార్పు అత్యంత సహజం
మనిషి, కోతి నుండి వచ్చాడని
కొందరంటారు, మరికొందరు కాదంటారు
స్వాగతించాలి, సహేతుక వ్యతిరేకతలను.

అది
మత మైనా, మతగ్రంధమైనా
వేదమైన, ఇతిహాసమైనా
నియమమైనా, ఆచారమైనా
సమూహమైనా, సమాజమైనా
సంస్కృతయినా, నాగరికతైనా

మార్పుకు నోచుకోకపోతే
అంతరించడం ఖాయం
గత సంస్కృతులు, నాగరికతలే
ఇందుకు ముఖ్య ఉదహరణ.

సమాజ హితంకోరి, మానవ హక్కులకై
దురాచారాలను, గుడ్డి నమ్మకాలను
ఎండగట్టి సంఘ బహిష్కరణకు గురై,
మానవవికాసానికై  అశువులు బాసిరి
మహానుభావులెందరో జన జాగృతికై

ఆ మార్పుకు ప్రతీకలం మనం !

ఈ తరం ద్వేషించి భహిష్కరించినా,
నిక్కచ్చిగా రేపటి తరం స్వాగతించేది,
ఆమోదించి పాటించేది  ఆమార్పునే
మార్పును స్వాగతించలేని వాడు
ఎంత జ్ఞానం సముపార్జించినా అజ్ఞానే
(CHANGE IS INEVITABLE, GROWTH IS OPTIONAL.)

నమ్మకం
(నమ్మకం + అమ్మకం = అపనమ్మకం)

అస్తిత్వపు పోరులో
ఆస్తికుడికి, దేవుడున్నాడని నమ్మకం
నాస్తికుడికి, దేవుడు లేడని నమ్మకం

కుటుంబ / సమాజ మనుగడకై
పెళ్లి, అనే ప్రక్రియపై ఓ జంటకు
చట్టాలపై వ్యవస్థకు ఉండేది నమ్మకం

అయితే

హెచ్చు తగ్గుల తేడాలతో
స్వార్థం, నిస్వార్ధాల ముసుగులో
లాభ నష్టాల బేరీజుల్లో

నమ్మకమే, అపనమ్మకానికి అమ్మై వెలసి,
నిజానికి ఇప్పుడు, నమ్మకం అమ్మకమై
మానవ సంబంధాలను వ్యాపారపరం చేసింది

ప్రేమిస్తే నమ్మాలా? ప్రేమిస్తే సరిపోదా?
అసలు ఎందుకు నమ్మాలి ? నమ్మించాలి?

నమ్మకం ఓ నిబంధన!,
స్వచ్చమైన ప్రేమకు నిబంధనలుండవు..
ప్రేమించే మనసుకు కావలసింది స్వేచ్చ

తల్లి బిడ్డను, ఆవు లేగను
నమ్ముతుందా ? ప్రేమిస్తుందా?
నమ్మకంగా ప్రేమిస్తుందా?

స్వార్ధానికి హేతువే నమ్మకం

నిస్వార్దానికి నిలువుటద్దం ప్రేమ
నమ్మకం, నివురుగప్పిన నిర్భంధ 
నిబంధనల సమాహారం!
ప్రేమకు పరమార్ధం మానవత్వం

 శిశిరం!

Autumn in canberra

ఆరు ఋతువుల క్రతువులో

చెట్టు కొమ్మమ్మకు చిగురై పెరిగి ఆకై, 

చివరకు పండిన ఎండుటాకై రాలి,

ఏదీ శాస్వతం కాదన్న

జీవిత సత్యాన్నినేర్పే

   ప్రక్రుతి పాఠమే శిశిరం! 

కేజ్రీ వాల్
----------
సనాతన ధర్మం, వేదాలను
క్రతువు, నైవేద్యాల పరిమితిచేసి
మనుషుల నెల్ల విభజించి

నీతిని
తాత ముత్తాతల మూతులకు
పరిమితంచేసి, పురాణ ఇతిహాసాలలో
కొందరిని కోతుల, అసురులచేసి

అవినీతిని
పురోహితుల పద్యశ్లోకాల్లోనే పంచి
మాకందరికవి జీవిత పాఠాలుగజేసి
అమ్మ ఒడిలో, బడిలో, గుడిలో, నడవడిలో

మము మార్చి ఏమార్చేసి

తమ భుక్తికై, మనుగడకై
కడు యుక్తిగా కుయుక్తితో
సనాతనమైన వేదధర్మాలను
వివరణ, విస్లేషణల వివరించక
యుగ ధర్మాలవని, వక్రీకరించి

ఈ కలియుగంలో
కర్మ సిద్ధాంత ఫలంగా వెలసిన అవతారం
అన్నింటా వెలసిన  అవినీతిదెయ్యమే దేవుడని
ఎందరికి తెలుసు? ఎవరొప్పుకుంటారు ?

మనది కాకపోతే .. ఎంత దూరమైతేనేం?
అన్న జానపద సామెత చందంగా !
స్వార్ధం, నిత్యావసర వస్తువులా పెరిగిపోయి
మనిషిని మనిషి పీక్కుతినే స్థాయికి
సమాజం దిగజారిపోయిన పరిస్థితుల్లో

ఏంచేద్దాం? ఇది మా క(ఖ)ర్మ!
అని సరిపెట్టుకొనే కలియుగ ధర్మానికి
వ్యతిరేకంగా విల్లు ఎక్కుపెట్టిన బాణంలా
దూసుకువస్తున్నాడు ..అడుగో...అతడే

అవినీతికి అడ్డుగోడై నిలిచి
అరాచాకులకు సవాల్ అని
రాజకీయ పోరాటం మొదలెట్టిన
"క్రేజీ వాల్" మన కేజ్రీవాల్

అరాచక రాజకీయ రణరంగమైన
చదరంగంలో పేదవాని పక్షమై
చీడను, పీడను దులిపేందుకు
చీపురుతో ప్రక్షాళన మొదలెట్టి

విసిగి వేసారిన సామాన్యుల జీవితాల్లో
వెలుతురు, వెన్నెల కురిపించే
సూర్యు చంద్రులు ఒక్కడై వెలిసి
అందరివాడై,  ఆమ్ఆద్మీ రధసారధుడై
అందరికీ ఆప్తుడైన, మనందరి అరవిందుడు

రండి ..కలసిమెలసి ఒకటిగా..కదలిరండి... దండుగా..
కుల మత, ప్రాంతాలకతీతంగా, మన దేశానికి
దశ, దిశ నిర్దేశించే నిబద్దత కూడిన నిర్ణయంతో
ప్రతినబూని, దేశ ప్రగతికై .. జన జాగ్రుతికై !

తెలుగు అక్షరం

------------------

తల్లి ఉగ్గుపాల మురిపానికి ఊతంగా

సత్యం, ధర్మం దర్శనాన నిదర్శనమై

మంచి, చెడు నిజ నిర్ధారణల హేతువై

మనిషి మేధోమధనానికి మాత్రుకై

నిత్యనూతనమై ఎల్లపుడూ ఓ జాతి

మనుగడకు భాషై, మాతృమూర్తిలా 

మనిషి మనసు పొరల్లో పెనవేసుకొని 

ఆలోచనల ఆకసాన నక్షత్రమై వెలిగి 

భవితకు బాటను వేసే మాటై మిగిలి

ఆటై, పాటై, పాదాల పెదాల నృత్యం చేసి

జీవన గతిని మార్చే చరిత్ర పుటల్లో

మానవ హితంకోరే మత గ్రంధాలలో

అన్నిటికన్నా మిన్నగా మనందరి

ఆత్మీయతానురాగాల మదిగదిలో

నిక్షిప్తం, సురక్షితం, తెలుగు అక్షరం

డాలర్ జీవితం
-----------------
డాలర్ జీవితం
---------------
అమ్మని చూడాలనిపించి
నాన్నని కలవాలనిపించి
తమ్ముడు గురుతుకొస్తుంటే
అక్క చెల్లిళ్ళు ఎలాఉన్నారో అని
రొటీన్ ప్రవాసజీవతంపై విసిగి
అందరూ ఉండికూడా, నాకు
ఈ ఒంటరి బతుకేంటని
అనిపించిందే తడవుగా
ఫ్లైట్ సెంటర్కెల్లి కనుక్కోగా
అమ్మో! టికెట్ ధరెక్కువని?
నెల జీతం తగ్గుతుందని?
మార్ట్ గేజ్ కి మనీ ఎలాగని?
వారం సెలవు పెడితే ఎలా?
అసలే కాంట్రాక్టు జాబని
డాలర్ల జాలర్ల గాలానికి చిక్కి
చేప వలె, ఆశ అడియాసైనదన్న
గజి బిజి మనసు సేద దీర్చెన్దుకై
ట్రెడ్మిల్లుపై మరోగంట నడువగా
ఆ స్వేదంలా, నీరుగారిపోయింది

ఏమిటో .....!
జీవితం, డాలర్ మయమైపోయింది
డాలర్ అయినా రూపాయి అయినా
అందరూ కొని తినేది ఆ మెతుకే మరి
నిగూడమైన ఆ మర్మం తెలిసేంతవరకే
 డాలర్ కోసం వెతికే ఈ కరెన్సీ బతుకు
అప్పటికిగాని పూర్తవదు ఈ ప్రవాసవనవాసం
అపుడు, ఇండియా, ఇంగ్లాండ్ అయినా
ఆస్ట్రేలియా, అమెరికా అయినా  అన్నీ ఒకటే !

ముగిసిన విభజన భజన

గడ బిడ రగడల రణ గొణ ధ్వనుల నడుమ
రాష్ట్రం, విభజన సమ్మెల కాష్టమై
బడుగు వారి జీవితాలను వెలకట్టి
ఆంధ్రప్రదేస్ ఆర్ధికప్రగతి అధోగతి పట్టించి
రంగులన్నీకలిసి రాజకీయ రాట్నాన
తిరిగి తిరిగి తుదకు తెలుపైనటుల
తెలుగు సోదరుల సంఘర్షణల మధ్య
వేర్పాటువాదాన,  ఏర్పాటైనవవిగో
తెలుపునలుపు మనసులతో .. తెలంగాణా సీమాంధ్ర రాష్ట్రాలు

ఓ తెలంగాణా తిరుమలేసన్నా!
రాయలసీమ రాజన్నా! కోస్తా కోటేస్వరన్నా!

నేను ఒకప్పుడు మీకు చెప్పింది
గురుతుందా? అయితే.. ఇనుకోండి ..

సంబరాన మునిగి అసలు సంగతి మరువకండి ఎందుకంటే ?
ఆ ఆనందాన మిము ముంచి, అప్పనంగా
అధికారం మింగేయాలని ఆత్రమాత్రంగా
మంత్ర రచనలో నిమగ్నమైన నక్కలవిగో
తమ వాటా కొరకై తెలివిగా మిము మొత్తంగా
వాడుకొని నట్టేట వదిలేసే నీతిలేని తోడేల్లవి

తెలివిగా మసలుకొని అందివచ్చిన ఫలాన్ని
సమంగా అందించే సామాజిక రాష్ట్రాల
నినాదాన్ని వినిపించి,  దీపం ఉండగానే
ఇంటిని చక్కబెట్టుకోమన్న చందంగా
ఊరిని, రాష్ట్రాన్ని ఏ ఒక్కరికి (ఏ కొందరికో)
చెందేలా కాక అందరికీ ఆ త్యాగఫలం అందేలా చూడండి

మొక్కై వంగనిదే మానై వంగనటుల
రంగులోళ్ళు రంగంలోదిగి నీలాటి బడుగులను
విభజించి పాలించక మునుపే మేల్కొని
అధికారం అందుకొని నిజాయతీకి నెలవై
నిస్వార్దానికి అర్థం ఇదని పాలించి నిరూపించు
రాజకీయ విలువలను నేర్పి నీవంటి వారి
జీవితాలకు వెలుగై, నీడైనిలువు నీ ఏలుబడితో

తెలంగాణా  సీమాంధ్ర రాష్ట్రాలు ఏర్పాటు జరగాలి సమ సమాజ నిర్మాణ ధ్యేయంతో,
నిలిచిపోవాలి దేశాన మన ఇరువు తెలుగు రాష్ట్రాలు అన్ని రాష్ట్రాలకు మార్గదర్సకంగా..


తెలంగాణా సీమాంధ్ర రాష్ట్రాల ఏర్పాటును అభినందిస్తూ.... స్వాగతిస్తూ !
తెలుగువారికి ఒక రాష్ట్రమే కాదు ఇరు రాష్ట్రాలని ఆనందిస్తూ అందరికీ మంచి జరగాలని ఆసిస్తూ .. " ఏది జరిగినా మన మంచికే " అనే సూక్తిని నమ్ముతూ
అందరికీ సుభాభివందనాలు.

గోరువంక

గోరువంక (ఇండియన్ మైనా)

------------
పసుపు ముక్కుతోడ
పసిమి కాళ్ళతోడ
నల్లాని మెడతోడ
నాజూకైన కళ్ళతో
గోధుమ రెక్కలతో
తోకన నలతెల్లని ఈకలతో
హొయలూ, స్టైలు గలిపి
మడిసోలె నడిసేటి
గొరింకా.!.. ఓ ఇండియన్ మైనా!!

అసలిక్కడ (ప్రవాసాన )
నీ గోడవేందో?  నీకు తెలుసా?
నిన్నీడకు తెచ్చింది
పురుగు పుట్రా తిని, ఇక్కడ
పంటపొలాలకు మాంచి
దిగుబడి వచ్చేలా, వారి
సంపద పెంచేందుకేగాని
నీకిక్కడ  నీడివ్వాలనికాదు

అనుకున్నది ఒకటైతే
అయిన్దొకటీ.. అన్నట్టు
ఇక్కడి పక్షుల ఇళ్ళు
నువు ఆక్రమించావని
ఆక్రోశం, ఆక్రందనలనడుమ
ఎన్నో నిజ నిర్ధారణలనుజేసి
నిను మట్టుబెట్టడమే భేష్ అని
చట్ట సభలలో గట్టిగ తేల్చేసి
చట్టాలనే తెచ్చారీ పెద్దదేశపోళ్లు
అవకాస ప్రజాస్వామ్యవాదులైన
తెలివి, తమ సొత్తనుకొనె ఈ తోడేళ్ళు

మనమేమో మన క(ఖ)ర్మ భూమి
బడుగుదేశమైన  భారతావనిలో
ఈడనుండి వచ్చే పొడుగుముక్కు(పెలికాన్) పక్షులకి
పులికాట్టనే ఓ ఉప్పునీటి సరస్సునే
వాటికి పర్యాటక కేంద్రంగా మారిస్తే
నీ నిర్మూలనకై నిఖార్సైన చట్టాలిక్కడ
అంతే! ఏం చెయ్యగలం? బలవంతుడిదే రాజ్యం!
అందునా, నీకుతెలిసిందేగా మనోళ్ళకు
పొరుగింటి పుల్లకూర మహా రుచని  !

అవునూ!.. నీకీ విషయం తెలుసా ?
నిన్నీడకు మొదటగా తెచ్చిన వీళ్ళు
పరాయిదేశం నుండి ఈ దేశానికొచ్చిన
ఇక్కడి మొట్ట మొదటి ఇమ్మిగ్రంట్లు
అలివిగానోళ్ళనంతమొందించి
అలివయినోళ్ళను అణిచివేసి
నోరు వాయ లేని ఆబోరిజన్లను
వారి సొంతమైన ఈ భూమిని
తమ అవసరాలకు అనువుగా మలచి
ఇది తమ దేశమని  పొజులిచ్చి
దేశాభిమానం చూపే అలివిగాని తెలివైనోళ్ళు

కాబట్టి, కాస్తంత తెలివిగా
(మనసుగాదు) మెదడెట్టి ఆలోచించు మరి!
ఇక్కడి పక్షుల (పక్షులను విడదీసి కడతేర్చే మనుషుల) జోలెల్లక
జాగ్రత్తగా మసలుకొని  లౌక్యంగా ఉండడం నేర్చి
నీ నివాసానికి ఆవాసమైన ఈ ప్రవాస ప్రపంచాన
పది కాలాల పాటు పిల్లా పాపలతో సల్లంగ బతుకు
            ****************

(గోరువంకలను (ఇండియన్ మైనా) ఇక్కడి పక్షుల సంరక్షణార్ధమై సంహరిస్తున్నారని తెలిసి, 
తెలుగు కవనవనాన  ఎన్నో ఎన్నెన్నో ప్రణయ భావాలను స్ఫురిమ్పచేసి ఎంతో మంది కవులను  ప్రభావితం చేసిన గోరువంకకై  స్పందించి వ్రాసిన ఓ చిన్న కవిత ... ఎవరినీ ఉద్దేశించినది కాదని చదువరులు భావించగలరు )

చిరస్మరణీయులు అక్కినేని.. అంజలీ దేవి

అక్కినేని నాగేశ్వర రావు(ఎ ఎన్ ఆర్ )

అందమైన ఆహార్యం 

చదువుకన్నా సంస్కారం

ఉన్నతమైన ఆలోచన

ఉదాత్తమైన ఆదర్శం 

అద్భుతమైన నటన 

అన్నీ మంచి అలవాట్లు

కలబోసిన దసరా బుల్లోడు

మూగమనసుల దోచినోడు

తెలుగు సినిమా సక్కనోడు 

తారై వెండి తెరపై వెలిగిన 

మన అందరి ఎ ఎన్ అర్ 

అసువులుబాసి, ఆకసాన 

సుక్కై(తారై) నిలిచి పోయే 

వెన్నెల్లో.. జాబిల్లికి తోడై

అక్కినేని ఆత్మశాంతికై ప్రవాసాన తెలుగు వారి నివాళి 

అశ్రునయనాలతో ఆ మహా మనిషికి  మా  శ్రద్ధాంజలి ... 

అంజలీ దేవి

ప్రియ సఖిగా, ప్రేమికురాలిగా

చరణదాసిగా, దేవతామూర్తిగా

మా తలిదండ్రుల తరానికి

హావభావాలతో సొగసైన తారగా

భక్తి భావాల గుడిలో దేవతలా 

వారి హృదయాలలో నిలిచి

తల్లి, బామ్మ పాత్రల పోషించి

మా తరానికి ఇంటింటా

అమ్మలా, అమ్మమ్మలా

ఆత్మీయానురాగాలను చూపి

నీ నటనలో జీవించి మెప్పించి

వెండి తెరపై ఓ తారవై వెలిగి

అందమైన వెండి వెన్నెల్లో 

చందమామతో ఆకసాన తారవై

వెలిగేందుకు, ఇక.. సెలవంటూ వెళ్ళిన

అమ్మ! అంజలీ ..నీకు మా శ్రద్ధాంజలి!!

వివేకానంద 150వ జయంతి

మానవజాతి హితంకోరేదే మతమని

వేదమన్నది ఏ మతం సొంతంకాదని

భక్తి, రాజ, జ్ఞాన యోగాలతో 

ధార్మికతకు, ఆధ్యాత్మికతకు

అర్థం చెప్పిన అద్వైత గురువు

వేదాంత విషయ విశ్లేషణ, వివరణలతో

యోగిగా, విరాగిగా, బైరాగిలా జీవించి

మానవాళికి యోగ, వేదాంతకాంతులు

పంచిన విధాత, విశ్వ యువత భవితకు

మార్గదర్శి, మానవతామూర్తి, స్పూర్తిప్రదాత

నరేంద్రుడు, నిష్కల్మషుడు, అసమాన్యుడు

దీన జనోభవ! అన్న కరుణరసమూర్తి 

ఆత్మానన్దస్వరూపుడు..స్వామి వివేకానంద!

                 ***************

"Take up one idea.

Make that one idea your life

think of it, dream of it, live on that idea.

Let the brain, muscles, nerves, every part of your body, 

be full of that idea, and just leave every other idea alone.

This is the way to success”

n  Swami Vivekananda (12th january - 4th july 1902)